Psa 5 | NdeIBE | STEP | Kumqondisi wokuhlabela. Kwabemifece. Ihubo likaDavida. Zwana amazwi ami, O Jehova, hawukela ukububula kwami.

Psalms 5

Kumqondisi wokuhlabela. Kwabemifece. Ihubo likaDavida.

1 Zwana amazwi ami, O Jehova, hawukela ukububula kwami.

2 Lalela ukukhala kwami ngidinga uncedo, Nkosi yami loNkulunkulu wami, ngokuba ngikhuleka kuwe.

3 Ekuseni, O Jehova, Ekuseni uyalizwa ilizwi lami; ekuseni ngibeka izicelo zami phambi kwakho ngilinde ngithembile.

4 Kawusuye uNkulunkulu othokoza ngobubi; ababi ngeke bahlale lawe.

5 Iziqholo ngeke zime phambi kwakho; uyabazonda bonke abenza okubi.

6 Uyababhubhisa labo abaqamba amanga; abomele igazi labakhohlisayo uJehova uyabenyanya.

7 Kodwa mina, ngomusa wakho omkhulu, ngizangena endlini yakho; ngizakhothamela phansi ngokuhlonipha ngikhangele ethempelini lakho elingcwele.

8 Ngikhokhele, O Jehova, ngokulunga kwakho; ngenxa yezitha zami yenza iqonde indlela yakho phambi kwami.

9 Kalikho lalinye ilizwi lomlomo wabo elithembekileyo; inhliziyo yabo igcwele ukubhidliza. Umphimbo wabo ulingcwaba elikhamisileyo; ngolimi lwabo bakhuluma inkohliso.

10 Tshono uthi balecala, O Nkulunkulu! Akuthi amacebo abo abe yikuwa kwabo. Baxotshele khatshana ngenxa yezono zabo ezinengi, ngokuba bakuhlamukile wena.

11 Kodwa akuthi bonke abaphephela kuwe bathokoze; mabahlabelele njalonjalo ngenjabulo. Basibekele ngovikelo lwakho, kuthi labo abalithandayo igama lakho bajabule ngawe.

12 Ngokuba ngempela, O Jehova, uyababusisa abalungileyo; uyabazungeza ngomusa wakho sengathi ubavikele ngesihlangu.